هل كلّ أنواع الأنيميا بتتعالج بالحديد..تعالوا نعرف ايه هي الأنيميا



هل كلّ أنواع الأنيميا بتتعالج بالحديد..؟

تعالوا نعرف ايه هي الأنيميا الأوّل..

الأنيميا هي نقص كريّات الدمّ الحمراء في الجسم.. و لإنّ كريات الدم الحمراء هي اللي بتشيل الأكسجين و بتوصّله للجسم فلمّا تقل دا معناه إنّ الأكسجين اللي واصل لجسمنا حيقلّ برضو..

و حنحسّ بأعراض زيّ:

🔴 ضعف عامّ

🔴 شحوب

🔴 زيادة ضربات القلب عند القيام بمجهود بسيط

🔴 ضيق التّنفس

🔴 صداع

🔴 برودة في الأطراف

🔴 دوخة

كلّ دي أعراض بسبب إنّ الأكسجين اللي خلايا جسمنا بتحتاجه لإنتاج الطّاقة و القيام بكل العمليّات الحيويّة قليل..

طيب ايه ممكن يسبب الأنيميا..؟

أيّ نقص في أيّ عنصر من العناصر اللازمة لتصنيع كريات الدم الحمراء..

كريات الدم الحمراء بتتصنّع في نخاع العظم.. و العمليّة دي محتاجة حاجات كثير منها الحديد و كمان فيتامين ب١٢ و الفوليك أسيد..

فلو أي حاجة من دول نقصت يحصل عندي أنيميا..

🔴 أنيميا نقص الحديد

و دي هي اللي بتتعالج بمكمّلات و محاليل الحديد

🔴 أنيميا نقص فيتامين ب١٢

و دي بتتعالج بمكملات/حقن فيتامين ب ١٢ و اللي بعضها بيكون فيها فوليك أسيد برضو..

طيب.. لو مافيش نقص في أيّ عنصر من دول ايه ثاني ممكن يسبب أنيميا..؟

🔴 لو معدّل تكوين كريات الدم الحمراء قلّ بسبب مشكلة في نخاع العظم نفسه.. زيّ مرض فقر الدّم اللاتنسجي ( أو فشل نخاع العظم ) و دا بيكون فيه كل مكونات الدم قليلة مش بس كريات الدم الحمراء..

🔴 لو معدّل تكوين كريات الدم الحمراء طبيعي بس معدّل تكسيرها هو اللي زيادة.. و دي اسمها الأنيميا التكسيريّة ( أو فقر الدم الانحلالي ) و لها أسباب و أنواع مختلفة كل واحد ليه علاجه..


لذلك لو خفنا يكون عندنا أعراض أنيميا ما نروحش ناخذ حديد على طول و إنّما لازم نعمل صورة دمّ كاملة و يشوفها حدّ مختص عشان يحدد نوع الأنيميا و العلاج المُناسب لها..

و دمتم سالمين و أصحاء.. 🌸


#طب_ولا_عك

#شير_في_الخير

#مريم_جاسر


4 عرض
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020