لو بتعاني من حبّ الشّباب فنصيحتنا ليك




أكيد كثير فينا عانى من مشكلة حبّ الشّباب في فترة ما..

الفترة دي في الغالب بتكون فترة المُراهقة و من هنا جات التسمية.. مع إنّ حبّ الشباب مش شرط يظهر في فترة المراهقة بل ممكن ييجي في أيّ سنّ عادي.. و لكن اللي بيخليه أكثر شيوعاً في فترة المُراهقة هي عوامل حنقولها دلوقتي..

في البداية الحبوب دي بتكون نتيجة انسداد المسام.. و دا بيحصل في حالة إنّ الغدد الدهنية الموجودة في بصيلة الشعر بدأت تفرز دهون أكتر من الطبيعي تسدّ المسام.. فبتهيّأ بكدا بيئة مناسبة لتكاثر البكتيريا اللي هي بتبقى موجودة بشكلٍ طبيعي في البشرة فتبدأ تزيد و تعمل إلتهابات..

الغدد الدهنية دي بتكون متركزة بشكل أكبر في الوجه و أعلى الظهر و الصدر و الأكتاف و دي الأماكن اللي بيظهر فيها الحبوب غالبًا..

طيب.. ايه العوامل اللي ممكن تسبب زيادة إفرازات الغدد الدّهنية؟

🔴 الهرمونات اللي بتزيد في فترة المراهقة و عشان كدا حبّ الشباب شائع في الفترة دي..

🔴 بعض الأدوية زيّ الكورتيزونات..

🔴 بعض أنواع الدايت زيّ النشويّات الكثير و فيه بعض الدّراسات بتقول إنّ الشوكولاتة بتزوّد حب الشباب برضو..

🔴 التوتّر و الضّغط النّفسي..

🔴 عوامل جينيّة.. لو الوالدين مثلًا جالهم حب شباب فمن المحتمل الأطفال يجيلهم برضو..


لو بتعاني من حبّ الشّباب فنصيحتنا ليك:

🔴 غسل الوجه يوميّاً بغسول مناسب لنوع بشرتنا حيساعد في إزالة أيّ إفرازات دهنيّة زيادة..

🔴 بلاش كريمات التّرطيب و الميك اب اللي أغلب مكوّناتها دهنيّة أو زيوت عشان ما تسدّش المسامّ..

🔴 ممكن نستخدم بعض المراهم/كريمات/ جيل للعلاج و اللي مش بتحتاج وصفة طبيّة زيّ الحاجات اللي مادتها بينزويل بيروكسايد ( أكنيروكسيد )..


لو الخطوات دي كلها ما جابتش نتيجة ففي خيارات ثانية و لكن ساعتها حنحتاج استشارة مختص:

🔴 مضادات حيوية موضعيّة زيّ أكنيمايسين.. و فيه منتجات بيبقى فيها المضاد الحيوي مع البينزويل بيروكسايد عشان يقلل من المقاومة البكتيرية زي أكني بينز..

🔴 مادّة الأدابالين أو التريتينوين في صورة موضعية برضو..

🔴 كورس مضاد حيوي زيّ فيبرامايسين..

🔴 آخر لاين هو مادّة الآيزوتيريتينوين ( نيت لوك ) و دا فعّال جدًّا و لكن ليه بعض المحاذير فبنلجأ له لمّا الحالة ما تستجيبش لأيّ علاج من العلاجات السابقة..


شاركوا البوست مع أيّ حدّ تعرفوه بيعاني من حبّ الشّباب.. 🙌🏻

و كالعادة دمتم سالمين و أصحاء.. 😄🌸


#طب_ولا_عك

#شير_في_الخير

#مريم_جاسر


4 عرض
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020