لسبب ما.. كثير من الناس بتظن إنه إذا كانت الكحة جافة (ناشفة) يبقى ده كورونا والعياذ بالله!!



وإذا كان فيها بلغم أو مخاط (كحة منتجة) يبقى الحمد لله نجونا ودي مش كورونا!! الكلام ده خطأ تماما!! صحيح إن من أشهر أسباب الكحة المنتجة للبلغم هي أمراض غير فيروسية (زي الإلتهاب الشعبي الحاد و التهاب رئة المدخنين).. و صحيح إن فيروس كورونا أول ما بيدخل الجسم ويتسبب في العدوى بيكون من أشهر أعراضه الكحة الجافة وارتفاع درجة الحرارة (زي أي فيروس تاني مسبب لنزلات البرد).. لكن طبيعة الكحة دي بتتغير غالباً خلال أيام قليلة حسب تطور المرض عند كل مريض.. فإذ تغلبت مناعة المريض على الفيروس وبدأ في التحسن.. فدرجة حرارة الجسم بترجع للطبيعي، والكحة بتتحسن تدريحيا!.. وإذا - لاسمح الله - دخل المريض في أحد المضاعفات.. فهناك سيناريوهين هم الأشهر وهم اللي ممكن يسببو الوفاة لا قدر الله.. واحد منهم إن المريض يدخل في التهاب رئوي شديد.. وهنا بتفضل حرارته عالية والكحة ممكن تزيد وبتتحول لكحة منتجة لإفرازات (كحة ببلغم أو فيها مخاط)، لكن بيظهر على المريض أعراض الإعياء والضعف العام والتعب والدوخة وممكن لون شفايفه يميل للأزرق، وده أمر خطير وممكن يتسبب في الوفاة، خصوصاً في كبار السن. والسيناريو الثاني هو إن المريض يدخل في "متلازمة الضائقة التنفسية الحادة" ARDS وهنا فعلاً بتفضل الكحة جافة لكن بيصبح العرض الأساسي هو ضيق التنفس مع الإعياء الشديد واللون الأزرق والغثيان والقيء والضعف العام والدوخة. *** يبقى إيه خلاصة الكلام ده؟؟ أنا عايز أقول إيه؟؟ ان مفيش حاجة اسمها: "لو كحة ناشفة تبقى مصيبة، لكن لو جافة تبقى خير وأمان!!" زي ما اتكلمنا أكثر من مرة في الفيديوهات.. اذا جالك أعراض نزلة برد.. ارتاح في البيت واشرب سوائل كتير وخلي حد من حبايبك يتابعك ويطمن عليك (حتى لو بالتليفون لو عايش لوحدك).. *** امتى -لا سمح الله - تروح المستشفى: في حالة: ضيق النفس أو صدور أصوات من صدرك مع التنفس الشعور بالتعب والضعف والإعياء الشديد والدوخة تحول الأغشية المخاطية (زي اللسان والشفايف) للون الأزرق الموضوع ليس له علاقة بنوع الكحة.. ولا بدرجة الحرارة (عشان شفت كلام كتير واختراعات بخصوص ان لو حرارتك أكبر من كذا يبقى فيروس ولو أقل من كذا تبقى بكتيريا - الكلام ده لا يحدد احتياجك للمستشفى من عدمه) ربنا يحفظكم جميعاً.. ودمتم سالمين.. #الدكتور #د_محمد_منصور #طب_ولا_عك #COVID19 #Coronavirus #كورونا #ARDS

20 عرض
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020