عاوز تاكل كل اللي نفسك فيه و بأي كمية انت عاوزها و ما تعملش رياضة و يبقي شكلك زي نجوم السينما


عشان محدش يقول محدش قاللي

عاوز تاكل كل اللي نفسك فيه و بأي كمية انت عاوزها و ما تعملش رياضة و يبقي شكلك زي نجوم السينما؟! 🍔

نجوم السينما الاجنبية طبعا لأننا عندنا حيتان برضه 🐳

هي طريقة واحدة بس ☝ تخليك توصل لكل ده (غير الفوتوشوب طبعا)

تعمل خير كتير ، و تتصدق 💰 و تكفل ايتام و بعد عمر طويل هتعمل كل اللي انا كتبته فوق ده

في الجنة ان شاء الله 🌴

خلاص هاعمل دايت و أخس و أبقى زي احمد حسام "ميدو" و اخسر ٥٠ كجم من وزني في شهر واحد 💪 كات 🎬 هايل يا فنان .... تستاهل ساندوتشين شاورما من ابو مازن السوري على المشهد الجميل ده

بعدين خليك صادق مع نفسك |، انت لا ارادتك و لا محفظتك 💸 يسمحولك تعمل اللي عمله ميدو (بصوت عزت العلايلي في الطريق الى ايلات)

طب ايه الحل 💭

بص يا ابن الحلال 👀 .... الموضوع معادلة من طرفين ✌ أكل و مجهود

تاكل اكتر من مجهودك ، الاكل الزيادة هيتخزن في جسمك ، و هيتخزن في أي حتة على مزاجه هو مش على مزاجك انت ، و غالبا بيتخزن في حتت ما يعلم بيها الا ربنا 😲

تاكل اقل من مجهودك يبقى هتخس ، ما لم يكن فيه سبب مرضي لعدم الخسسان

و أنا صغير والدتي ربنا يديها الصحة و يبارك فيها 🙏 بعد ما فاض بيها من كسلي قالت لي "انت كده .... تحب الجوع و الراحة" أنا كان اول مرة اسمع المثل ده و حسيت بانها ظالماني فرديت و قولتلها "بالعكس ، انا باحب الشبع و الراحة 😍... جوع ايه بعد الشر"

و دارت الأيام و قدرت اني انزل من ٩٥ كجم ل ٨٠ كجم في شهر واحد بدون دايت ولا عذاب ولا حرمان و انا بأكل شيكولاتة 🍫 و كل اللي نفسي فيه و الاجمل اني قدرت احافظ على وزني الجديد لمدة ٤ سنين دلوقتي باستخدام المعادلة البسيطة

أكل قصاد مجهود 🏇

طيب ازاي تأكل اقل من غير ما تحس بالحرمان؟ و ازي تزود مجهودك من غير ما تحس بالتعب؟

ده هنقوله في بوست تاني ان شاء الله

#طب_ولا_عك #الدكتور #علاء_السويفي

3 عرض
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020