حنتكلّم النّهاردة عن أحد أنواع إصابات الرّكبة الشّائعة..تمزُّق غضروف الرّكبة الهلالي



✔️ ايه هو الغضروف الهلالي دا..؟

الأوّل حنقول شرح بسيط كدا للتركيب التّشريحي لمفصل الرّكبة.. عندي التقاء لـ٣ عظام في المفصل دا:

🔴 عظمة الفخذ..

🔴 عظمة القصبة..

🔴 عظمة الرِّضفة ( الصّابونة )..

الغضاريف الهلاليّة بقى هي الغضروفين اللي موجودين في كلّ ركبة ما بين عظمة الفخذ و عظمة القصبة.. و ليهم شكل الهلال ( شكل حرف C ) و من هنا جات التّسمية..

✔️ ايه وظيفة الغضاريف دي..؟

الغضاريف دي موجودة عشان تساعد في تقليل الاحتكاك ما بين عظمتي الفخذ و القصبة.. و عشان تمتصّ الصّدمات النّاتجة عن المشي أو الجري.. و كمان عشان تساعد في ثبات المفصل و توزيع وزن الجسم بشكل متساوي على عظمة القصبة..

✔️ أعراض الإصابة بقطع الغضروف الهلالي:

🔴 ألم عند ثني أو تدوير الرّكبة..

🔴 صعوبة في فرد الركبة بالكامل..

🔴 تورّم الرّكبة أو تيبُّسُها..

✔️ طيب ايه اللي ممكن يعمل إصابة زيّ دي..؟

🔴 بالنّسبة للبالغين الأصغر سنًّا تمزّق الغضروف الهلالي غالبًا سببه تعرّض الرّكبة لخبطة مّا أو القيام بحركة مُعاكسة لحركة المفصل الطّبيعية أو أعنف منها..

عشان كدا الرّياضيّين اللي بيمارسوا رياضات قد يحدث فيها التواء أو دوران لمفصل الرّكبة زيّ كرة القدم أو الرّياضات القتاليّة بيكونوا أكثر عرضة للإصابة دي..

🔴 أمّا كبار السّن فقد يكون التّمزّق نتيجة لتآكل الغضروف مع التّقدم في السّن..

✔️ علاج التّمزق بيعتمد على نوعه و مكانه بالضّبط.. و على سنّ المريض.. طريقة العلاج بيحدّدها الطّبيب حسب العوامل دي..

لكن حنقول الخيارات المُتاحة:

🔴 العلاج الأولّي الغير مُشتمل على جراحة:

و دا كافي لو كان القطع بسيط و في الجُزء الخارجي للغضروف ( و هو الجُزء اللي بياخذ غذاؤه من الأوعية الدّموية و دا ممكن يلتئِم.. )

بنعمل بعض الخطوات البسيطة زي:

🔹 الرّاحة: و إيقاف الأنشطة اللي سببت الإصابة..

🔹 يمكن استخدام كيس من الثّلج لمدّة ثلث ساعة عدّة مرّات خلال اليوم لتخفيف الألم..

🔹 ممكن نلبس ركبة..

🔹 مضادات الالتهابات الغير سترويدية ( زي السيليبريكس و الأركوكسيا ) أيضًا مفيدة في تخفيف الألم و الالتهابات..

🔴 لو الخطوات دي ما جابتش نتيجة فهنا ممكن التّدخُّل جراحيًّا:

🔹 خياطة الغضروف: و بتنفع في حالات معيّنة فقط زيّ لو كان سنّ المريض صغيّر و القطع غير مُتهتِّك و في مكان قابل للإلتئام..

🔹 الاستئصال: في حالة عدم مُناسبة خيار الخياطة..


في نهاية البوست شاركوا المعلومات دي مع العائلة و الأصدقاء و دمتم سالمين و أصحاء.. 😄🌸


#الدكتور

#طب_ولا_عك

#مريم_جاسر

26 عرض1 تعليق
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020