حدّ فينا تخيّل إنّ ممكن المضادّ الحيوي دا ما يبقاش فعّال؟



بالتأكيد كلنا أخذنا مضاد حيوي لسببٍ أو لآخر.. لكن حدّ فينا تخيّل إنّ ممكن المضادّ الحيوي دا ما يبقاش فعّال؟ و لو مناعتنا ما كانتش قويّة كفاية أو لو العدوى نفسها كانت شديدة ممكن نموت؟ 😨

للأسف ربما نكون في طريقنا لهذا المصيرِ المُرعب.. ☹️

و العصر الذّهبي للمضادات الحيوية اللي بدأ في خمسينات القرن الماضي و لغاية دلوقتي على وشك أن ينتهي.. طيب ليه؟ ما كل حاجة كانت زي الفل.. ينتهي ازاي؟

✔️ الفكرة إنّ #البكتيريا كائن حي هي كمان.. و بتقدر تطوّر طرق تحمي بيها نفسها من المضاد الحيوي.. 🤷🏻‍♀️ و كمان بتنقل الطرق دي لسلالات البكتيريا الثانية.. كل اللي هي محتاجاه عشان تعمل كدا هو إنها تكون شافت المضاد الحيوي دا قبل كدا.. دا معناه إنّ من أول مضاد حيوي ظهر و المقاومة ابتدت تظهر هي كمان..

طب اشمعنا دلوقتي يعني اللي خايفين..؟

✔️ لإنّ زمان كان معدّل اكتشاف و تطوير #المضادات_الحيوية كبير جداً.. كل شوية كان بيطلع واحد جديد.. فايه المشكلة أمّا واحد و لا اثنين يحصل منهم مقاومة..؟ عادي.. ماحنا لسة عندنا كثير.. لكن دلوقتي للأسف ماعدناش بنطوّر مضادات حيوية جديدة.. كُل أسلحتنا الفتّاكة تمّ كشفُهَا.. 😨

طب نعمل ايه..؟ 😓

✔️ أوّل حاجة ما ناخذش #مضاد_حيوي غير لمّا الطّبيب يوصفه.. المضاد الحيوي دا اتعمل عشان يعالج العدوى البكتيرية فقط.. نحط تحت العدوى البكتيرية دي خط و تعالوا نشوف احنا بنعمل ايه كدا.. 🔴 في البرد مثلاً.. البرد مش عدوى بكتيرية إطلاقاً.. و لذلك حباية البرد و حقنة البرد دي أسوأ شيء ممكن حدّ يعمله.. لإنّ بيتحطّ فيها مضادّ حيوي..

🔴 برضو أحد الأسلحة الفتاكة اللي بتتسفّ عندنا في مصر للأسف الشّديد هو الـ Averozolid و مثايله.. الدّواء دا أشدّ الأدوية فتكًا بسُلالات بكتيريّة مافيش حاجة بتأثر فيها غيره.. لمّا نستخدمه عمّال على بطّال و يحصل منه مقاومة دي تبقى كارثة.. 😨

✔️ ثاني حاجة لازم نكمّل كورس المضادّ الحيوي.. و الكورس مش شريط و لا علبة.. كل عدوى بكتيريّة لها الكورس الخاصّ بيها.. فنتّبع تعليمات الطّبيب/الصّيدلي و ما نوقّفش المضادّ الحيوي من عند نفسنا لمجرّد حسينا الأعراض خفّت..

لو تعرفوا أيّ حدّ بيستخدم المضادات الحيوية بكثرة شاركوا معاه البوست دا و دعونا ننشُرِ الوعي سويّةً.. ✊🏻

و دمتم سالمين و أصحّاءَ دومًا.. 🌸😁

#الدكتور #شير_في_الخير #مريم_جاسر

5 عرض
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020