بعض أطفالنا بنلاحظ إنّهم أشقياء أكثر من غيرهم.. 👧🏻




بعض أطفالنا بنلاحظ إنّهم أشقياء أكثر من غيرهم.. 👧🏻

يعني مثلًا ما يثبتش في مكانه.. 🤸🏻‍♂️

ما يحلّش الواجب.. 📚

ساعتها ممكن نفكّر إنّ دا طفل غير منضبط و إنّ معاقبته هي السّبيل لتقويم سلوكيّاته الخاطئة .. لكن في الحقيقة ساعات الطّفل مش بيكون شقي و لا حاجة.. و إنّما بيكون مصاب باضطراب نقص الانتباه و فرط الحركة..


✔️ اضطراب نقص الانتباه و فرط الحركة أكثر شيوعًا في الأطفال منه لدى البالغين..

✔️ ٦٠٪؜ من الأطفال الأعراض عندهم بتختفي لمّا يوصلوا سنّ البلوغ.. و الـ ٤٠٪؜ الباقيين الأعراض بتكمّل معاهم و لكن بتقلّ و بتكون نقص انتباه فقط بدون فرط حركة..

طيب خلينا نتكلّم شويّة عن أعراض الاضطراب دا..

الـ DSM- 5 ( الدّليل التّشخيصي و الإحصائي للاضطرابات النّفسيّة ) قال لنا إنّ احنا حنلاقي يا إمّا نقص انتباه أكثر.. ( و دا نادر في الأطفال و أكثر في البالغين ) يا إمّا فرط حركة أكثر.. يا إمّا الاثنين مع بعض.. ( و النوعين دول هما الأكثر شيوعًا في الأطفال )


أمثلة على أعراض نقص الانتباه:

🔴 الطّفل غير قادر على التّركيز على التّفاصيل ( لو طريقة لعبة أو لو درس بيتشرح له في المدرسة مثلًا )

🔴 سرحان لمّا بتكلّمه

🔴 صعوبة في تنظيم المهام ( مش بيعرف يرتّب غرفته بسهولة مثلًا )

🔴 حتلاقيه مش بيحبّ الألعاب اللي محتاجة مجهود ذهني.. أو مش عارف يحلّ الواجب بتاعه مثلًا..

🔴 يسهُل تشتيت انتباهه.. لو ماصدّقت تخلّيه يركّز معاك أخيرًا أبسط حاجة حتخليه يسرح منك ثاني..


أمثلة على أعراض فرط الحركة:

🔴 مش قاعد على بعضه.. بيفرك و هو قاعد..

🔴 ما بيصدّق يلاقي فرصة يقوم من مكانه.. بالذّات في الفصل مثلاً..

🔴 متسرّع في ردود أفعاله.. لو أنتَ بتسأله سؤال مش حيسيبك تكمّل و حتلاقيه بيقاطعك..

🔴 مش بيستنّى دوره.. لو بيلعب مع زمايله لعبة بالدّور مثلًا حتلاقيه مش عايز يستنّى..


✔️ بتبدأ الأعراض تبان في سنّ ٣-٤.. بداية سنين النّمو و التّعلّم لدى الطّفل..

✔️ الاضطراب دا بينتج من عوامل جينيّة و تربويّة مع بعض.. عشان كدا من أهمّ سبل العلاج تدريب الأبوين من قبل مختص على طرق التّعامل مع الطّفل.. و توعيتهم إنّه مش شقي و لكن محتاج صبر شويّة عشان يكتسب المهارات و يتعلّم..

و طبعًا عندنا أدوية بتحسّن الأعراض كثير.. عشان كدا لازم اللجوء لطبيب سواءً عشان الدّواء او عشان العلاج السّلوكي..

و زيّ ما قلنا أغلب الحالات بترجع طبيعية عند سنّ البلوغ و الموضوع مفيش منه مشكلة لو تمّ التعامل معاه بشكل صحيح في سنوات الطّفولة..


شاركوا البوست و ساهموا في التّوعية بأهميّة الدّور التّربوي في الصّحة النّفسيّة لأطفالكم.. 🌸


و دمتم سالمين و أصحّاء.. 😊🌸


#طبّ_ولا_عك

#الدكتور

#مريم_جاسر


3 عرض
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020