ازاي احرق سعرات زيادة من غير ما اتعب



طلب بسيط: لو استفدت من البوست اعمله شير عشان غيرك يستفيد #شير_في_الخير 📷:)

عشان محدش يقول محدش قاللي نكمل كلامنا بتاع اليومين اللي فاتوا

* ازاي احرق سعرات زيادة من غير ما اتعب ؟

اقولك يا سيدي

انت ممكن تشترك في الجيم بس للأسف ده مش هيجيب نتيجة و لا يحرق سعرات غير لما تنزل فعلا تروح الجيم 😅 و الحاجة الوحيدة اللي هتتحرق من الاشتراك في الجيم غالبا هبيقى دمك بعد ما تدفع اشتراك الجيم

*طيب ايه الحل؟ الحل ياسيدي اني هاكتبلك السعرات اللي بتحرقها كل يوم في الانشطة العادية و انت شوف ايه اللي بتحب تعمله في الانشطة دي و زود المدة اللي هتمارس النشاط ده فيه

ملحوظة مهمة: ده متوسط اللي بيحرقه الشخص متوسط الوزن في نصف ساعة من ممارسة النشاط ده

النوم 23 سعر حراري مشاهدة التلفزيون 28 سعر حراري (لو بتشجع الزمالك غالبا هتحرق أكثر 🤣) القراءة جلوسا 42 سعر الوقوف في الطابور 47 سعر الطهي 93 سعر التسوق في الهايبر ماركت بعربية التسوق 130 سعر الحركة العاددية 130 سعر اللعب مع اطفالك 149 سعر تنظيف البيت 167 سعر تحريك العفش 223 سعر تصليح السيارة 112 سعر شغل السباكة او الكهرباء في البيت 112 سعر شيل السجاجيد 167 سعر الشغل على الكومبيوتر 51 سعر شغل المكتب الخفيف 56 سعر

طيب لو ربنا كرمك و قررت تعمل رياضة بص يا سيدي كل نص ساعة هتحرق الاتي رفع اثقال 112 سعر تمارين خفيفة 205 سعر تمارين عنيفة 260 سعر قيادة الدرجة 260 سعر بلياردو 93 سعر بولينج 112 سعر مشي 149 سعر مشي سريع 186 سعر سباحة 223 سعر كرق قدم 260 سعر جري 298 سعر نط الحبل (ركز في دي قوي) 372 سعر 😯 (ايوة زي ما سمعت كده)

*طيب أنا كشخص عادي محتاج احرق كام سعر في اليوم؟ المفروض في الاحوال العادية اننا ناكل على حسب ما احنا محتاجين من طاقة و دي من تعاليم الرسول الكريم على فكرة (بحسب ابن أدم لقيمات يقمن صلبه) بمعنى منظمة الصحة العالمية تنصح بممارسة انشطة حركية من متوسطة الى شديدة لمدة 150 دقيقة اسبوعيا على الاقل لو انت بتعمل كده يبقى هتحتاج حوالي 2500 سعر حراري في اليوم للرجال و 2000 سعر حراري في اليوم للسيدات

* طب فين المشكلة؟ المشكلة اننا غالبا مش بنمارس النشاط المطلوب اسبوعيا و المشكلة الاكبر اننا بناكل حسب رغبتنا في الاكل مش حسب احتياجنا للطاقة و بالتالي الحل انك تزود مجهودك عشان تخليه يتناسب مع كمية الاكل اللي انت بتاكلها

يعني انت لو أكلك بيديك 4000 سعر حراري في اليوم يبقى هتحتاج تبذل مجهود يحرق ال2000 سعر حراري الزيادة دول و ده عشان بس وزنك ما يزيدش مش عشان تخس عاوز تخس هتحتاج تحرق اكتر 😉

نصيحة مفيدة: حاول تنزل على موبايلك تطبيق يتابع مجهودك البدني اليومي ، الموضوع ده محفز جدا للمواظبة على نفس النشاط اليومي

دمتم بصحة

#طب_ولا_عك #الدكتور #علاء_السويفي

1 عرض
قنوات تتبعنا:
Logo.png
  • YouTube
  • White Facebook Icon

حقوق النشر محفوظة لموقع الدكتور 2019-2020